Sëlva – Ai 11 de juni à l Cumité de Copa dl Mond de Gherdëina tenì tla pitla sala dla Cësa de Cultura de Sëlva si senteda generela. Argumënt zentrel dla reunion fova l lëur di ultimi diesc ani,  da canche n tlap de jëuni ova sëurantëut la direzion dl cumité d’urganisazion. Depona ti iel uni cialà al daunì y ala cunseguënzes che aspieta  la Copa dl Mond per l gran mudamënt che fej sënn tres i media. Ala fin iel uni partides ora deplù uneranzes.

Danter i nviei fova i ambolc de Sëlva y Santa Cristina, Peter Mussner  y Eugen Hofer, l ambolt de Urtijëi Ewald Moroder, i ex ambolc Roland Demetz y Bruno Senoner, l presidënt d’unëur y dla copa dl mond Erich Demetz, la presidënta dl cunsorz turistich Christine Demetz,  l presidënt y l diretëur generel dl Dolomiti Superski,  Sandro Lazzari y Franz Perathoner, l maresciallo di Carabinieri Othmar Senoner n cont dl colonello Georg Di Pauli di Carabinieri de Val, i ex-atlec Lotte Nogler y Peter Runggaldier, l diretëur nuef dla Scola de schi de Urtijëi Pauli Rabanser y n grum decumëmbri dl cumité d’urganisazion.

L’ aministradëura dla Copa dl Mond,  Stefania Demetz, à mustrà su te n referat tler y vif  l svilup dla copa dl mond ti ultimi diesc ani. „Ie rate che l ie debujën dediché na pert de mi relazion a l’ aministrazion dla copa dl mond che ie nia auter che n spiedl de nosta prufescionalitá y de nosc rendimënt. Chësc per trëi rejons: ue vester trasparënta, rumé ora uni suspet y dé de contra (widerlegen) a nutizies de stampa tendenziëuses”. L’ avenimënt sportif nternaziunel se damanda l mascimo  mpëni a duc i livei. „Nëus son na urganisazion non-prufit (zënza davani). Purempò muessa l lëur, la respunsabltà y la cumpetënzes uni piëdes. Nëus perdujon n plusvalor (n profi) zënza spartì su l davani y chësta ie nosta gran ndesfideda.  Alincontra davania ntëurite duc canc, dala televijion, ai sponsor nchina al turism”, spliega Stefania Demetz.

Te si relazion a puntin sun la sajon passeda à l presidënt dl Saslong Classic Club, Edmund Dellago, rujená dla veles dla FISI y dl sciclub,  di cuntrac de retlam y dla televijion coche nce dla segurans ciaradëusa dla manifestazion.  Depona ie l presidënt jit ite sun la mudazion dla generazions te deplù cumiteies y gremiums nternaziunei y cumerziei, ti dajan pëis  al daunì di media che ie te na fasa de gran trasfurmazion.  „Una dla cunseguënzes dla trasfurmazion sarà che l azetanza dl publich pra la garejedes giaperà na majera mpurtanza. Cërta garejedes che vën me fates per la televijion, ue di zënza publich, unirà bonamënter tëutes ora dal calënder.“

L diretëur de gara, Rainer Senoner,  à te si relazion nteressanta paredla l ntervënt de persones y l mpëni de materiai dal 2000 al 2010. L ie dantaldut tumà tl uedl tan de material che l cumité à messù cumpré per curespuender ala ghiranzes dla federazion nternaziunela FIS. N cont de culaburadëures ne n iel n fregul demanco, ma cun de majera cumpetënzes.  Senoner à ala fin rengrazia si predezessëur  Nando Rudiferia y duc si cunlauranc che à  judà a njenié ca l purtoi cun gran savëi y lezitënza te duc chisc ani.

L respunsabl dla comunicazion, Gernot Mussner, a rujenà dl mpurtanza dl nfurmazion ntëur ala manifestazioni ite. L ie uni fat scialdi ti ultimi diesc ani per purté la sala stampa cun si njinies y la strategies de nfurmazion  a n livel nternaziunel y pudëi vester nscila for n fruz danora ala aspetatives dla federazion nternaziunela FIS. “Tl daunì messeran secudì mo deplù i jurnalisć acioche i se sënte de cësa te Gherdëina”, a dit Mussner.

Peter Mussner, l ambolt nuef de Sëlva, ie te n curt salut jit ite sul motto dla copa dl mond „Passion & Performance“ (pascion y efiziënza): „Do vosc referac é capi la pascion, l’ardimënt che ve animea a mëter a jì la copa dl mond y cun ciun savëi che ti jëis permez. Mussner à dit de ulëi jì inant sun l medemo troi dl ex ambolt Roland Demetz: “Cunescion la problematighes dla lia y cialeron de ve sustenì ulache la va“.

L presidënt dl Saslong Classic Club, Edmund Dellago, ti a depona per si meric per la copa dl mond sëurandat ai ambolc da ntlëuta de Sëlva y S.Cristina, Roland Demetz y Bruno Senoner, y al ex vize-ambolt de Sëlva, Heini Senoner, n diplom d’unëur.

„Me sentì unerà“, à dit Roland Demetz te si paroles de rengraziamënt. „Dal 1996 inant é udù l svilup positif dla copa dl mond. Son uni tëut su bën y ve mbinci dut l bon per i ani che à da uni“.  
„Nce sce ne fajeré nia plu pert dl cunsëi, uniré mpo ala garejedes“, à dit Bruno Senoner, „ma chëst’iede me plu sciche scëmpl spetadëur“.

Heini Senoner, che fova zapa ite tl cumité tl 1966, à dit che sce l mesëss mo n iede jì de reviers pona fajëssi-l avisa sciche ntlëuta. „É vivù de beliscimi ani deberieda cun vo“. Nscila l ex-atlet y ex-vizeambolt de Sëlva.

L cunsëi à numinà i ex-ambolc Roland Demetz y Bruno Senoner a cumëmbri d’unëur. Heini Senoner, resterà inant tl cumité d’urganisazion.

Per si atività ntan 10 ani alalongia ti iel uni dat na recunescënza a Othmar Prinoth da Brida che se cruzia dla segurëza y al cumandant di destudafuech de S.Cristina, Chrisoph Senoner, che se cruzia dla lueges da meter ju i auti. L Cumité ie unì ngrandì cun de plu cumëmbri nueves ti setëures dla stampa, dla pista y dla manifestazions ntëurvia.

La garejedes de Copa dl Mond te Gherdëina ie chëst ann ududes dant ai 17 y 18 de dezëmber cun l super y la tlassica garejeda libra.
….